Mense Augusti de mandato imperiali per totum Regnum seta cruda emi prohibetur,
similiter sal, ferrum, et es emi non nisi a doana imperiali mandantur.
Serra super Celanum firmata iussu imperiali diruitur.
Eodem mense magister domus Alamannorum in Lombardiam uadit.
Constitutiones imperiales Melfie publicantur.
Mense Septembris aput Sanctum Germanum, sicut per totum Regnum, pondera et mensure
mutantur, ponuntur rotuli, et tumini. Tinctorias omnes de Regno ad opus fisci imperialis
recipi precepit Imperator, et super hoc suas mittit litteras generales. Quas cum
Iudei pro iudeca Sancti Germani recipienda detulerint, ipsam Reginus archiepiscopus capi
prohibuit, mandans ipsis Iudeis, ut ipsam in pacem dimittant monasterio Casinensi.
Mense Octobris Marinus Carazulus miles Neapolitanus cum filio Annei de Rivo Matricio
uenientes ad Sanctum Germanum cum litteris imperialibus et mandato pro reparatione
castrorum imperialium, requirebant Casinensem abbatem ex parte Cesaris, ut homines terre
monasterii mittere deberet ad muniendum Atinum, castrum Celii, roccam Bantre, et roccam
Guillelmi.
Mense Novembris Romani, comperto quod Imperator in eorum odium Uiterbium receperat,
et ad ipsius ciuitatis auxilium miserat quemdam Raynaldum de Aquauiua capitaneum,
et de gente sua cum eo pro tuenda re publica magnam pecunie quantitatem ecclesiis Urbis
in odium pape imponunt.
Mense Decembris Imperator aput Ravennam natale Domini magnifice celebrat et eo die
licentiam dedit omnibus de Regno, qui secum iuerant, in propria reuertendi.
Nummi aurei, qui Augustales uocantur, de mandato Imperatoris in utraque sycla Brundusii
et Messane cuduntur.
|
|