In sororis premisse suffragium, pregnans coloribus, excusatrix venit
epistola quam misistis. Que, tamquam efficientis cause munita presidiis,
ad obtinendam de lite victoriam multas secum et varias evidentis rationis
allegationes adduxit. In cuius conflictu sic vinci totaliter reputans, ad vindictam
inermis suppliciter dictantis postulat uterus, ut, quotienscumque
de calamo tenui nudam ad vos et rudem pariet paranimpham, lingue
vestre suavitas, que necessarios habet in talibus exornationis ammictus,
nudum operiat, incoctum queso reducat ad fabricam, scabrositates eliminet
et emendationis stilo poliat impolitum. Est enim que vires mihi
modicas minorat ingenii, laboris assidui tedium, causa precipua, que,
temerarie validitate potentie, nedum ornari quod dicitur impedit, sed dictionem
etiam simplicem interdicit, dum, operantis humeris continua fatigatione
fragilibus tam aspero iugo suppositis, vix respirationis hora conceditur,
vix cogitationi tempus ydoneum, nisi quod furtiva predatione
subripitur, operario relaxatur. Sed tamquam ignis delatus in gremio quicquid
interius forsitan repentine colligitur, manualis cure perplexitas imbibit
quicquid temptatio passim pensantis eruptuat, de quaternionis cura
sollicitudo continua, quem mihi rerum eventus penalitatis sociavit interpretem,
ambitiosa consumit.
|
|