QUALITER CONSTANTINUS IMPERATOR
PRIMUS CONSTRUXIT HIC ECCLESIAM.
Anno dominice incarnacionis septingentesimo tercio, indiccione
.XV., residente in Sede apostolica sancto papa Sisinnio,
apud Constantinopolim imperante Iustiniano, in Francia
Pipino seniore regnum agente, apud Ticinum Aripert Longobardorum
rege, apud Beneventum Gysolfo summo duce, sanctus
et venerabilis pater noster Paldo, huius loci primus abbas, una
cum caris et eque sinctissimis fratribus Tatone et Tasone,
postquam in sancta conversacione diu decertantes in locum habitacionis
antique super fontem fluminis ad mille passus ubi Vulturnus
oritur, parvam solum ecclesiam quam invenerant amplioribus
edificiis augentes, monasterium in honore beatissimi levite
et martiris <Vincencii> statuissent, et post odorem unguentorum
Christi currentes, eciam aliis bonus odor Christi ad vitam esse
cepissent, facta est eis non parva congregacio fraturm in amore
Christi fervencium, quorum sacra conversacio longe lateque manaret.
quibus sanctus Paldo primus cepit esse pastor et abbas,
quod est pater. sed qualiter hic locus antique abitacionis fuerit,
vel a quibus predicta ecclesia in primis edificata, sicut a fidelibus
viris et religiosis patribus didici, narro.
|
|