Audito quod venerabilis pater P. Salernitanus archiepiscopus, cui devotionis
et obsequii me fateor debitorem, per partes ipsas diebus istis inopinate
transierit, eius me tedet, in transitu visionis optate beneficio caruisse.
Cumque vix possit non amari quod placet, et libenter videri soleat quod
amatur, paternitatem vestram devotus exoro ut processus et reditus sui
tempus, quod consuevit de viris saltem illustribus vel vox famosa predicere
vel apparatus alicuius interiectio prenotare, cum ad noticiam vestram
pervenerit, mihi benignitas vestra queso prenuntiet, ut quod in aggressu
eius habere non valui, signo vestro, quod comparabitur muneri, obtinere
gratanter merear in regressu.
|
|