suos ante uel inter lectos magistrorum habere. Si necesse habent surgere,
prius magistros excitent et postea accensa laterna si nox est ad necessitates
suas explendas cum magistris ambulent. Praeter abbatem, priorem,
magistrosque eorum nulli liberum sit in loco custodiae eorum deputato
sedere nec uerbo nec signo aliquid eis innotescere, nisi accepta licentia
ab abbate uel priore. Quae licentia cum conceditur, magister sedere debet
inter iuuenem et eum qui iuueni loquitur. Iuuenis cum iuuene non
loquatur, nisi audiente et intelligente magistro quid utrimque dicatur.
Magistri inter eos sedeant uel ante eos sic ut eos cum uolunt conspicere
ualeant. Cum dormitum uadunt tamdiu stent ante ipsos magistri usque
dum ipsi iuuenes in lectis suis iaceant cooperti. Si nox est cum candelis
accensis assistant. In monasterio, capitulo, refectorio, processione
mixti sint senioribus non obseruato, si necesse sit, ordine conuersionis
eorum. Si ad mensam legunt uel de coquina seruiunt, surgentibus
a mensa fratribus cum eis ad monasterium uadant et dicto Et ne nos
cum custodibus ad refectorium reuertantur; duo simul aut plures, si fieri
possit, de conuentu non remaneant. Quod si paucitas maiorum et
pluralitas iuuenum aliter agendum coegerit, sufficientes eis custodes
deputentur.
Porro si custodia illa iuuenum, quae in nonnullis cenobiis tenetur,
magis placet, ut uidelicet in diuersis ac separatis ab inuicem locis per
claustrum sedeant, singuli singulos aut plures, si tanta copia est, custodes
habeant. Singuli singulas laternas in nocte ferant. Custos iuuenem non
relinquat nisi commendatum alicui fratri, in quo et de quo bene confidat.
Omnis denique custodia ei adhibeatur quae superius descripta est.
<DE INFIRMIS>
Frater aliqua sui corporis incommoditate detentus si conuentum sequi
non potest, humiliter prius in capitulo petita uenia iussus surgere stans
fateatur se non posse conuentibus interesse propter infirmitatem suam.
Cui respondet abbas uel qui loco abbatis ordini praesidet Omnipotens
dominus concedat uobis utilem sanitatem, sicut uobis expedire cognoscit. Amodo
tractate uos secundum infirmitatem uestram et remanete de conuentibus, sicut
uobis melius uisum fuerit . |
|