Non prodesse solet, potius sed nummus obesse
Moribus: hoc virtus sepius icta cadit.
Virtutes habeas, virtutum dote nitescas:
Has retinens, omni tempore dives eris.
Virtutum titulis qui non splendescit, egenus
Semper erit, dives sit licet ere nimis;
Non in denariis multis opulentia, verum
In cordis potius nobilitate manet;
Semper erit locuples animo qui dives habetur,
Cordis egens mediis est sitibundus aquis.
Moribus ergo magis quam nummis spem tibi pone:
Denario falli, non probitate potes".
"Caprea sepe canem fetum per rura sequentem
Fallit, se mediam dum parat inter eos:
Hoc facit ut cane se, dimissa prole, sequente,
Hinnulus evadat qui capiendus erat.
Sic me compositis temptas seducere verbis,
Adventus causam ne fateare tui.
Exprime cur venias, vanum depone timorem,
Sepe timor mentem cecat et ora ligat.
|
|