Et qui erat paradysum peragrare solitus,
Mundus ei mancipetur in maligno positus .
Non sit requies in illo ante diem obitus.
Ne sit nudus, vestiatur tunica pellicia .
Velit nolit, consenescat in nostra militia.
Ad portandos hunc curvabit fasces avaricia,
Quem cupiditas docebit aliena quęrere,
Qualicumque quibit modo, etiam cum scelere,
Et tenacitas monstrabit fossis cuncta credere.“
Talibus deliramentis congregantur perfidi,
Et qui sunt quocumque modo ad peccandum fervidi,
Et Medea fascinante qui videntur herbidi.
Cahin profugum et vagum caput sibi eligunt,
Sub quo urbem construentes, muris eam sepiunt;
Concedatur ut abusus, communiter exigunt.
Tunc deceptrix horum dixit: „Non detur abusio,
Nisi generis humani veniat confusio,
Et discurrat inter eos demonum illusio.
|
|