in quo de consuetudine schola virgariorum praeparat lectum
domno papae, in letania maiori venienti ad Sanctum Petrum.
DE EADEM RE.
50. In Naumachia iuxta ecclesiam Sanctae Mariae in Transpadina
est sepulchrum Romuli, quod vocatur Meta, quae fuit miro
lapide tabulata; ex quibus opus graduum Sancti Petri peractum fuit.
Haec habuit circa se plateam tiburtinam .XX. pedum cum cloaca et
floiali suo; habuit quoque circa se therebinthum Neronis tantae altitudinis,
quantum et castellum [H]adriani imperatoris, miro lapide
tabulatum. Quod aedificium rotundum fuit, cum duobus geronibus,
sicut castrum; quorum labia erant cooperta tabulis lapideis
pro stillicidiis. Et iuxta hoc aedificium crucifixus fuit beatus Petrus
apostolus.
DE EADEM RE.
51. Est et castellum, quod fuit memoria [H]adriani imperatoris,
sicut legitur in sermone sancti papae Leonis de festivitate sancti
Petri, ubi dicit: << Memoria [H]adriani imperatoris mirae magnitudinis
templum constructum >> quod totum lapidibus coopertum et
diversis historiis est perornatum. In circuitu vero cancellis aeneis
circumsaeptum, cum pavonibus aureis et tauro aeneo; ex quibus pavonibus
duo fuerunt de illis, qui adhuc sunt in cant[h]aro paradisi
Beati Petri. In quatuor partes huius templi fuerunt quatuor caballi
aenei deaurati. In unaquaque fronte portae aeneae. In medio giro
fuit sepulchrum porfireticum, quod nunc est Lateranis, in quo
sepultus est Innocentius papa II; cuius coopertorium est in paradiso
Beati Petri super sepulchrum Praefecti.
|
|