arguebat. Non ob aliud nisi quia illa omnia
sic simulatoria gerebantur, tanquam verum esset
quod dicebant illi qui sine circumcisione praeputii,
atque aliis observationibus umbrae futurorum, putabant
credentes salvos esse non posse.
20. LANFR. Cum autem venisset , etc. Item probat
quia nec Antiochiae a Petro Evangelium accepit,
quia restitit ei; erat enim reprehensibilis.
21. In faciem ei restiti . Utile non esset quod palam
nocebat corrigi in occulto; praesumendum namque
erat de charitatis infirmitate [ f. , firmitate] tanti
apostoli. Vel ideo quod quidam subinducti insidiabantur,
qui referrent Paulum non esse ausum arguere
Petrum; et circumciderentur.
22. Si tu cum Judaeus . Gentiliter vivebat; quia
indiscrete cum omnibus edebat, et neminem immundum
putabat. Probat autem quia cum sit Judaeus,
et tamen gentiliter vivat, non debet gentes ad judaismum
cogere. Est autem in libro totus syllogismus
praeter conclusionem.
23. Cogis judaizare . Exemplo suo gentes judaizare
cogebat Petrus, et ritum Judaeorum sequi, quando
ipse in praesentiam eorum qui ex Judaeis crediderant,
a consortio gentilium more Judaico se
subtrahebat.
24. AUGUST. ( Exposit. in Epist. ad Galat. , c. II.)
Et non ex gentibus . Peccatorum nomen gentibus
imposuerunt Judaei, jam vetusta quadam superbia,
tanquam ipsi justi essent, videntes stipulam in oculo
alieno, et non trabem in suo; sicut interest inter
irridentes et irrisores, inter murmurantes, et murmuratores,
inter scribentes et scriptores, et caetera
similia; ita Scriptura peccatores appellare consuevit
valde iniquos, et peccatorum sarcinis
oneratos.
25. LANFR. Peccatores ]. Generali vocabulo peccatores
vocat idololatras.
|
|