Domino abbati fratri … Stephanus.
Litteras tuas novissime mihi directas recepi, inter cetera continentes
inesse tibi votum ad … monasterium, per viam permutationis, non absque
ambitionis et inconstantie vitio, convolandi: quod multum displicuit et
merito votis meis, cum planta que intempestive sepeque transfertur minime
consueverit convalere. Propter quod scire te volo, quod super hoc partes
meas nullatenus interponam, cum dominus cancellarius velit et desideret,
et iam proposuerit, cum in regno erimus, te provehi per favorem
regium ad maiora. Laudo igitur et consulo bona fide, ut in ea qua vocatus
es sorte persistas, donec te dormiente faverit, amicis flantibus et super te
vigilantibus, fortuna prosperior, que consolari poterit ambitiosam et instabilem
mentem tuam. Item vehementer admiror, cum voraginem tue cupiditatis,
que sevior ignibus Ethne facta experientia comprobatur, nulla possit
promotio saturare, et tu me ex omni parte deplumas et ad me nullam
compassionem extendis. Caro mea mihi non compatitur quid faciat aliena,
et non considerat me tantis laboribus subiacere. Nam per promotionem
tuam relevari sperabam, quod a direptione rerum mearum decetero abstineres
et sufficerent tibi tue. Hoc autem in contrarium incedit, cum nec mee, nec
tue res tuam valeant cupiditatem inexplebilem satiare. Scripsisti
mihi de molendinis; respondeo: non concessit mihi natura volatum, ut
veloci traiectu secans aera venire possim de Francia in Apuliam una die.
Non sitis namque corda leporina habentes, ut permittatis vos a malivolis
conculcari, sed corda leonina viriliter assumentes.
|
|