24

A.D. MCLXII, in mense Octubris. Pisani Consules, Coccum et Bottacium legatos
ad imperatorem Constantinopolitanum cum duabus galeis honorifice miserunt. Secundo anno,
in festivitate Sancti Petri, Bottaccius Pisas cum duabus predictis galeis reversus est, Cocco
cum imperatore remanente in Constantinopolim per unum annum, concordiam et conventionem,
quem Pisani cum eo facere volebant, pertractante; quem imperator Constantinopolitanus
facere promisit, si Coccus legatus et civitas iuraret, quod non esset cum imperatore Frederico
contra eum et eius terram, et quod non daret ei consilium neque adiutorium contra eum,
nec hostem vel exercitum super eum faceret, promittens eidem legato et civitati magnam
pecuniam. Que omnia legatus et civitas pro amore imperatoris Frederici facere recusavit.
Et sic postea Pisas X kal. Iulii reversus est.
A.D. MCLXI I, XV kal. Ianuarii, Villanus, pisanus archiepiscopus, cum una galea armata
ad papam Alexandrum usque Terracinam navigavit. Videns hoc Alexander, cum gaudio
archiepiscopum recepit, et Nativitatem Domini ibidem una celebraverunt. Post hec, in
galea archiepiscopi usque Plumbinum devenit, et ibidem archiepiscopus magnum honorem
domino Alexandro exibuit. Deinde venit Vadam, quem cardinales cum una galea de Gaeta
et duabus sagittiis de Roma secuti sunt; deinde applicuit Livornam. Hoc audientes, Pisani
Consules consilium de non recipiendo Alexandrum habuerunt, propter amorem et pavorem
imperatoris Frederici. Cognoscente Alexandro voluntatem civitatis Pisane, festinanter ad
Portum Veneris navigavit; et ibi Rainerius de Parlascio, qui cum eo ibat in Franciam, apud
Tirellum monachus factus, mortuus et sepultus est kal. Februarii. Exinde navigavit ad
Portum Delphini; et ibi electum Pipinum Lunensium consecravit. Proinde aplicuit Ianuam,
quem Consules Ianuensium cum universo populo et ianuensis archiepiscopus, cum omnibus
clerici suis, cum processione, Alexandrum et pisanum archiepiscopum et cardinales receperunt.
Hec audiens inperator Fredericus, suos legatos Ianuam direxit, qui Alexandrum cum
cardinalibus sibi ex parte Imperatoris dari aut teneri captum postulavere; quod Ianuenses
facere contempserunt; immo Alexandrum cum tribus galeis et duabus sagittiis, et cum archiepiscopo
Mediolanensium, qui ad eum iverat et archiepiscopo Pisano cum galea sua, cum
honore et triumpho, octavo kal. Aprilis in Provinciam per mare transduxerunt: ad portum
Montis Pesulani honorifice receptus est Alexander.