Unde repercussa tempora nostra dolent;
Morsibus inde canum sum totus dilaceratus,
In foveamque cadens, ut miser ecce moror.
Numquid peccavi quoniam sponsalia Polle
Tractabam, precibus compatiendo suis?
Legitimos sociare thoros non crimen habetur:
Copula nam legitur ista reperta Deo.
Uxores habuisse lego multos patriarchas,
Deque viris sanctis creditur illud idem.
Coniugium reor Ecclesie primum sacramentum:
Est etenim talis pactio grata Deo.
Hoc igitur nocuisse michi non cogito, tanta
Ut michi deberent imminuisse mala.
Forsitan et potuit nobis res ista nocere
Firmari quoniam cum ratione potest:
'Non desiderio carnis, sed spe faciende
Prolis coniugium fit statuente Deo'.
Coniugium Polle Paulino consociande
Non sobolis, verum carnis amore foret;
Nam cum sint steriles, Paulinus nec generare,
Conceptum Polla nec retinere valet.
|
|