et superstitiosi et totum mundum vellent subiugare sibi,
si possent, et rusticiter tractant mercatores qui vadunt ad eos,
et care vendendo, et multa passagia in diversis locis in suo
districtu ab eisdem personis eodem tempore accipiendo. Et si aliquis
mercator portat ibi merces suas ad vendendum, non potest
eas secum reducere, immo oportet quod vendat eas ibi, velit
nolit. Et si aliqua navis non sua cum mercibus ex aliquo infortunio
maris declinat ad eos, non potest inde recedere, nisi prius
omnes merces suas vendat ibidem. Et dicunt quod ex voluntate
divina processit quod navis illa declinavit ad eos; cui contrariandum
non est.
De V calliditatibus seu sagacitatibus Venetum contra Ravennates et alios
Lombardos.
Quodam tempore, cum comes Roglerius de Bagnacavallo dominium
haberet Ravenne, venerunt Veneti et fecerunt unum castrum
in dictrictu Ravenne, in egressu vallium et in ripa Padi, per navigium
quod vadit a Ravenna ad Padum, e regione Sancti Adalberti.
Et promiserunt Ravennatibus quod volebant ibi habere castrum
usque ad L annos, et annuatim ex ista concessione solverent
Ravennatibus civibus sive communi Ravenne quingentas libras
ravennatium; et bene solvebant, ut vidi.
Sed Veneti quinque calliditates sive malitias in isto negotio
habuerunt. Prima fuit quia, cum ista concessio ad tempus iam
dictum deberet existere, id est usque ad L annos deberet durare
et non plus, disponunt eam facere sempiternam; et in argumentum
huius rei non solum sufficit quia hoc dicunt, verum etiam
et factis ostendunt, quia, cum prius de lignamine castrum fecissent,
modo fecerunt de muro. Secunda, quia ita claudunt navigii
viam Lombardis, quod nec a Romagnola nec a Marchia Anchonitana
aliquid possunt habere, a quibus haberent frumentum,
vinum et oleum, pisces et carnes et salem et ficus et ova et caseum
et fructus et omnia bona que ad vitam spectant humanam, nisi
Veneti impedirent. Tertia, quia omnia ista per istas duas provincias
colligendo discurrunt, preveniendo Bononienses, ne prius
|
|