gemebundo; et illud est inter cetera desiderabile cordi meo, persone
vestre mihi dulcissime perfrui visione. Ad quod obtinendum viam paro et
quam citius potero veniam vos visurus, a vobis, mater dulcissima, revidendus,
qui per Dei gratiam sanus vivo, quod de vobis audire desidero incessanter.
Recomendo me benedictionibus vestris humiliter et devote.
… fratri … frater salutem et concupite gratiam visionis.
Die iovis … litteras tuas recepi et, dum ipsas legendo percurrerem, leticia
licet vana fuit animus meus respersus, dum vitam incolumem et maternam
mendaciter assererent sospitatem. At cum communis sororis Agnetis
lectio litterarum, occultum mihi longo iam tempore, nimis improvide,
veraciter et provide matris transitum revelaret, preconcepta nugaciter
ipsa letitia in mestitiam subito fuit conversa. Ruperunt lacrime, irruere
singultus et hominis utriusque compago irriguit pre nimietate doloris; sicque
me orbatum utroque parente conspiciens, et me iturum ad eos, non ad
me reversuros eosdem considerans, laudavi nomen Altissimi, qui mortis et
vite tenet imperium, et in Ipso, post lacrimas et singultus, consolationem
assumpsi. Laudo te, frater, in hoc non laudo, quod obitum dicte matris
tanto tempore occultasti. An putas me ipsam debere credere immortalem,
ut ex novitate quadam me coniectares irremediabiliter consolari et exacerbare
|
|