Benzo Albensis : Ad Heinricum IV. imperatorem libri VII

Pag 374


Post hec salutant Latium
Et Ticini palacium,
Visitant multa alia
Regnando in Italia.

Fides perseverantiam
Diligit et constantiam;
Dat infulas constantibus,
Regna perseverantibus.

Qui incipit et deficit,
Hunc ab horchestra deicit;
Nullus ei vult credere,
Qui tali sordet scelere.

Per annorum volumina
Tenuit mundi culmina,
Cum parvis et maioribus
Fuit multis temporibus.

Huius erant signiferi
Seniores episcopi;
Hanc firmant suis monitis
In urbibus et compitis.

Sed venerunt heretici
Ebrii et frenetici,
Erraverunt ab utero
Cum capite Lucifero.

Ibant per nostras curias
Suas docentes furias;
Facti servi perfidiae
Delatrabant cotidiae

Contra fidem catholicam
Nec non et apostolicam.
Sed victi a nostratibus
Cessarunt a latratibus.

Torna all'inizio