vestras ut fructu redeant multiplicato distrahite, at, cum presto vobis in
tempestate sit portus, post labores vicina tranquillitas, post timores annexa
securitas et proxima consolatio post dolores, qui nostis tempora debita partitione
distinguere rerumque vices temporibus adaptare, quid nobis et aliis
magis expediat providentes, iacentis in luto servuli, qui magis sentit in hac
parte quam loquitur, mementote.
Abbati Casinensi Nicolaus de Rocca.
Recentis iacturam vulneris, quo de adverse fortune pharetra prosiliens
nuper sagitta me pupugit, vel verius, casuales eventus exuperans et pro
voto permutans, divina visitatio me correxit, credebam vobis maturius
querula propositione detegere et doloris acerbi molestias latius aperire, ut
a vobis experte multipliciter medicine consilia languor assumeret et tristitie
nebula, de perdita parte corporis genas obducens, sacro vestri solaminis
lintheo tergeretur. Sed inter lacrimas hactenus amaricatus obmutui, cum
loquendi facultas ad verba mihi parca tenacitate succurreret et dictionis
lepide fluvium singultus obstitia prohiberent; dato iam itaque tempore
luctui, quod volo, pater, et debeo vobis devotione me solita recommendo.
Cumque, domine, magister Aymo de Pontecurvo, lator presentium,
verba, quorum vobis in urbe si bene recolitis me nuntium fecerat vive
vocis, utile sibi credat per litteras iterari, ad preces eius, quas obaudire non
debui, preces adicio, ut quod honori vestro et negotii qualitati conveniens
sanctio vestra decreverit fieri faciatis.
|
|