Pag 153

Karoli Magni. Hic Desiderius edificavit ecclesiam de Lene, et uxor eius ecclesiam
sancte Iulie in Brisciana diocesi. Sed cum alias Dei ecclesiam impugnans Faventiam,
Ferrariam seu Comachium de Ravennate abstulerit exarchatu, Karolus rogatu Adriani pape
in Ytaliam venit, Desiderium in Papia obsedit, dimisso exercitu Romam properavit, a Monte
Gaudii usque ad ecclesiam sancti Petri pedes accedens, et factus est Romanorum patritius;
rediens Desiderium captivavit et Lonbardos sue ditioni subposuit anno Domini DCCLXXIII;
aput quos regnatum fuerat, postquam Ytaliam intraverant, et an[nis] CCVI. Deinde Karolus
reversus in Frantiam Saxoniam subiugavit.
Anno Domini DCCLXXVII. Leo aput Constantinopolim regnavit an[nis] VI. Post
quem venit imperium in manus uxoris Leonis nomine Yrene.
Anno Domini DCCLXXXIII. Yrene aput Constantinopolim regnavit cum filio
Constantino an[nis] X. Cuius temporibus, scilicet anno Domini DCCLXXXVI, crucis signum
repente in vestibus apparuit, et sanguis de terra et celo profluxit. Hanc Yrenem, quia Karolo
nubere voluit, Greci monasterio intruserunt et Nichoforum elegerunt.
Anno Domini DCCXCIII. Nicophorus aput Constantinopolim regnavit an[nis] VIII;
post quem Stauratius filius eius regnavit men[sibus] IIII. Aput Romam Adriano Leo papa
successit. Hic synodum celebravit, in qua dampnavit hereticos dicentes Christum Dei
filium adoptivum. Hic anno Domini DCCXCVIIII, dum pergeret ad Sanctum Petrum die sancti
Marci cum letaniis, captus est, excecatus et mutilatus; cui Dominus visum reddidit et loquelam.
Hic pergens ad Karolum duxit eum Romam; et purgante se de quibusdam criminibus, facta
est vindicta de inimicis. Ideoque coronavit eum in imperatorem.
Anno Domini DCCC, anno ab Urbe condita MDLII. Karolus, cum regnasset in
Frantia an[nis] XXXIII, a Leone papa unctus est in Romanum imperatorem, et imperavit an[nis]
XIIII, men[se] I, d[iebus] XIII. Hic confirmavit ecclesie Romane que donaverat ei
Pipinus pater suus, et adiunxit ei ducatum Spoletanum et Beneventum, et alias etiam ecclesias
possessionibus ampliavit. Hic cum Michaele, qui post Stauratium aput Constan-
tinopolim regnavit an[nis] II, et post cum Leone successore pacem perpetuam hoc modo firmavit,
ut alter alterius frater nominetur et alter ab altero semper iuvetur; Grecus imperator habeat
Orientem et Constantinopolim, et Karolus et successores habeant Romam et Occidentem.
Abhinc igitur gesta orientalium Grecis cronographis relinquentes, que aput nos
gesta sunt occidentalia prosequamur.
His in pace conpositis Karolus Ierosolimam causa orationis per Constantinopolim ivit; per
Siciliam, per Calabriam, Apuliam Romam rediit; et Aquisgrani reversus, ubi sedem regni constituit,