Pag 115

Anno Domini CCLXXVI. Aurelianus aput Romanos regnavit an[nis] V et men[sibus] VI,
vir in bello potens, haud dissimilis Alexandro. Qui tribus preliis in Ytalia scilicet aput Placenciam
et Ticinum, victor extitit. Tetricum, qui adhuc Galliam tenebat, superavit et
Aurelianis civitatem edificavit et Zenobiam uxorem quondam Odenati, que mortuo
viro adhuc Orientis tenebat imperium, superavit aput Inmas, non longe ab Anthyochia. Cum
itaque triennio Romanum orbem ab invasoribus liberasset, ingrediens Romam
triumphum habuit quasi receptor Orientis et Occidentis, precedentibus eum Tetrico et Zenobia, a
qua Rome Zenobia familia nuncupatur. Hic primus aput Romanos diadema capiti suo imposuit et
aurata veste usus est. Hic Romam firmioribus muris cinxit. Templum soli edificavit, populo
usum porcine carnis instituit. Demum, cum Greciam introisset, inter Constantinopolim et
Herachiam fulmen iuxta ipsum cecidit, et non multo post occisus est et inter deos adnumeratus
est. Huius temporibus Paulus Samosatenus hereticus in Antyochenos
concilio dampnatus est.
Anno Domini CCLXXXII. Tacitus aput Romanos regnavit men[sibus] VI, vir egregius,
sed nichil potuit morte preventus.
Anno Domini CCLXXXIII. Florianus aput Romanos regnavit men[sibus] II et diebus
XXIII, nil egit dignum memoria.
Anno Domini CCLXXXIII. Probus aput Romanos regnavit an[nis] VI, men[sibus] III,
vir militaris et civilis, qui Gallias a barbaris occupatas recepit, et cum bella innumera peregisset,
pacem orbi recuperavit, dicens milites in brevi necessarios non futuros. Cuius
temporibus Felix Rome sedit episcopus, qui constituit missas super memorias martyrum
celebrari. Cui successit Marcus, qui statuit, ut nullus, etiamsi maioris probitatis et
scientiae, preponat se prius ordinato. Hic sanctus martyrium evasit. Cui successit Euticianus,
qui suis manibus multos martyres sepelivit, et novas fruges et uvas benedici constituit. Et invaluit
heresis Manicheorum dogmatizans duo principia, bonum et malum, purgationem per sua
sacramenta promittens; non recipiebant vetus Testamentum et novum corrumpebant; que
usque in hodiernum diem venenum effudit.
Anno Domini CCLXXXVIIII. Carus aput Romanos regnavit an[nis] II cum filiis
Numeriano et Carino, quos cesares instituit. Carus vero, cum Parthos et Persas vicisset,
super Tygridem fulmine hictus interiit. Numerianus per insidias, Carinus in prelio brevi
tempore occiduntur. Quorum tempore Gaius Rome sedit episcopus, qui statuit,
ut VII Romani diacones soli pape ministrent.
Anno Domini CCXC. Diocletianus aput Romanos regnavit an[nis] XX. Hic Herculium
Maximianum cesarem fecit, qui pacem Gallie reformavit. Ideoque ex cesare fecit augustum,
assumens eum in consortem imperii. Et quia Britania, Affrica, Egyptus et Oriens occupabantur,
Constantium quoque et Galerium cesares fecit. Constancio privignam Herculii dedit
uxorem nomine Theodoram, Galerio suam filiam dedit uxorem nomine Valeriam. Cum
his igitur et per hos Britaniam recepit et Galliam et Affricam et Egyptum. Cum itaque