Terdonenses et Mediolanenses, qui ibi aderant et
infra solam civitatem se omnes reduxerant, quia dux Henricus
cum suis Saxonibus iamdudum totum burgum de Terdona
ceperat et illum ardendo penitus destruxerat, se amplius
regis manus evadere non posse cernentes regi se omnes tradiderunt,
eo videlicet pacto, quod ipsi omnes masculi et
femine extra civitatem cum omnibus rebus, quas ipsi portare
possent, exirent, alias vero res omnes, quas insemel portare
non possent, ipsi regi eiusque exercitui penitus dimitterent.
Cumque omnes foras cum rebus illis, quas portare potuerunt,
exissent, exercitus regis ac ducis et Papiensium infra ipsam
civitatem pergens totamque expolians ac postea comburens
eam penitus usque ad fundamentum dissipavit.
His itaque peractis rex Terdonam deserens Papiensesque
ibi, ut eam civitatem bene dissiparent, relinquens Romam cum
suo exercitu perrexit. Papienses vero muros civitatis et turres
ac domos omnes destruentes post ipsum regem per octo dies
ibi steterunt ac deinde Papiam cum magno gaudio reversi
sunt.
|
1
5
10
15
|