Domino abbati Casinensi Stephanus.
Ascendit fumus aromatum de aureo propitiationis vestre thuribolo prodiens
et sic habunde replevit nares cordis et corporis vis odoris, quod interior
homo gaudiis exultans uberibus paternitatis vestre nomini …
ympnum concineret, novum canticum personaret. Est siquidem fumus iste
odor suavissimus fame vestre, que oleo effuso consimilis in odorem
unguentorum vestrorum et odorantes allicit et alliciendo attrahit e longinquis,
aromaticus pertulit rumor ad curiam, quod, alias vestras virtutes
innumeras consolidans, pastorum fundamina, idem ipsorum verba vel
facta confibulans, columpne locum inmobilis prelatorum tenens in actibus,
dominatrix constantia comitatur, prudentie similis ac providentie
glutino basibus sic innixa, ut, spirituum perversorum conatus irridens,
adulatorum flamina vorticosa comminuens et detractorum labia mendosa
concludens, supra firmam petram vestrorum actuum beneplacens et margaritis
renitens intentio sit fundata. Hec, pater, pastorem inserviunt, hec
prelatum reverendum faciunt, hec subditorum tumentia corda subtiliant,
hec viam falsis fratribus in vestimentis ovium gradientibus, intrinsecus
autem rapacitatem lupinam gestantibus, intercludunt. Det ergo vobis
Deus gratiam, quod et mala possitis evitare consilia et processus vestros
et actus salubris perpetuitate consilii roborare.
|
|