29. ( ibid. ) Aemulantur , id est, invident vobis,
qui vos carnales de spiritualibus velunt facere; hoc
est aemulantur non bene.
30. ( ibid. ) Filioli mei . Parturitionem hanc pro
curarum angoribus positam intelligamus.
31. LANFR. Parturio . Nati et parti erant in fide
Christi; sed quia quidam illorum fidem dimiserant
pariendi iterum ab Apostolo erant, quod usque formaretur
Christus in eis.
32. AUGUST. ( ibid. ) Donec formetur . Formatur
Christus in eo, cum formam Christi accipit.
33. ( ibid. ) Mutare vocem . Quid aliud dicatur, nisi
quia filios suos dixerat esse, parcens eis per litteras,
ne, severiore objugatione commoti, facile in ejus
odium traducerentur. Vellem ergo, inquit, nunc adesse
apud vos et mutare vocem meam, id est, negare
vos filios meos, quia confundor in vobis.
34. LANFR. Dicite mihi, qui sub lege vultis esse .
Non debetis velle sub lege esse, sed sub ecclesiastica
gratia; lex enim servos generat, Ecclesia liberos:
Quod Scripturae auctoritate sic probat, dicens ancillam
Agar Abrahae servum genuisse, Saram vero liberam
liberum filium edidisse. Et ne dicas quod Sara
et Agar ad legem et Ecclesiam [ sup. pertinent], et
quod earum filii, ad utrumque populum. Et respondet
Apostulus quod dictum est de duabus matribus
et earum filiis, per allegoriam, de lege et gratia debere
intelligi. Quod plenius invenies ibi: Sed qui de
ancilla , etc.
35. Quoniam Abraham . Ostendere vult honestius
sub gratia Novi Testamenti esse quam sub lege Judaeorum.
Abraham, Deus Pater intelligitur; duo
filii, plebs Judaeorum et populus gentium; ancilla,
lex quae servos gignebat, timore cogens eos, dicens:
Si quis hoc vel illud fecerit, morte moriatur; libera,
praedicatio Novi Testamenti, quae liberos generat,
paterna dilectione admonens eos dicens: Venite ad
me, omnes qui laboratis, et onerati estis, et ego vos
requiescere faciam; jugum enim meum suave est, et
onus meum leve est ( Matth. XI).
36. Secundum carnem , id est, carnalem consuetudinem.
|
|