In sequenti die Mercurii, in quo fuit tunc festivitas sancti
Bartholomei apostoli, ivit imperator cum maximo exercitu
Cremonensium et Papiensium atque Laudensium et marchionum
atque comitum et cum Papie navigio et cum petreriis Laudensium
duabus ad pontem Placentinorum, quem ex navibus
per mediam Placentiam construxerant, destruendum. Et
in die Iovis summo diluculo pontem cepit expugnare. Quem
Placentinis ab inicio viriliter defendentibus, due petrerie
subito eriguntur. Quocirca Placentini pontem sic integrum
se non posse tueri considerantes, ipso toto destructo naves
omnes integras ad suam ripam conduxerunt. Petrerie tamen
ab una parte Padi usque ad aliam lapides prohicientes duos
de Placentinis interfecerunt.
Et eo die maximum detrimentum accidit Mediolanensibus
et maxime his de porta Romana, videlicet quod bene tercia
pars tocius Mediolani combusta est. Nec fuit aliqua porta
in toto Mediolano, que ex aliquo latere non combureretur.
Et magna aura tunc ventilante multe domus optime,
in quibus valde confidebant et idcirco omnem ipsorum suppellectilem
reponebant, exarse sunt. Et multi nobiles equites
deducti sunt idcirco ad inopiam et summam necessitatem,
|
1
5
10
15
20
|