meditatione hanc veram traditiunculam legite, sollicita indagatione
discutite, sagaci intellectu capite, tenaci memorie
commendate.
Inter breve enim temporis spatium, si meis
ammonitionibus obsecundare volueritis, huius artis scientiam
adipisci valebitis ac per nostrarum regularum compendiosam
traditionem prosaicarum epistolarum poteritis comprehendere
rationem, quam specialiter vestre utilitati enucleandam
suscepi, generaliter tamen omnibus profuturam nullius spernat
invidia.
Primum itaque dictatorem oportet cognoscere grammaticam,
rhetoricam, dialeticam, eloquentie studia huic operi
necessaria.
Grammatica enim, cum sit recte loquendi scientia , verba
cum nominibus docet coniungere ceterasque dictiones congrua
ratione disponere. Hec autem sunt fundamenta et
huius artis initia et primordialia indicia.
Rhetorica vero distincte, ornate, expolite componere,
unicuique persone, necnon ordini et dignitati congrua
accidentia distribuere, ordinem et modum discernere.
Dialetica autem proponere et assumere mostrat
et concludere.
|
|