tibi coniungar. Sed O quantum illa coniunccio erit infelix! Nam ex
tali coniunccione necesse est quod vnus nostrum exinde moriatur. "
Deinde uidebatur sibi quod ymago illa eadem ferebat in manu
quandam lanceam, in cuius lancee summitate uidebatur haberi
quedam turricula tota ex piscibus artificiose composita. Deinde
uidebatur sibi quod illa ymago recedere uellet ab eo. Que dicebat
sibi: "Hoc est signum impie disiunccionis que inter nos duos est
postremo futura. " Vlixes autem tunc sompno solutus ualde miratus
est de ipsius sompni uisione; multum sui disquirit in animo ad
quid sompnum ipsum tendat. Demum illucescente die perquirit
augurios et diuinos et eos ad se uenire mandauit. Quibus uenientibus
et recitata eis ipsius sompnii qualitate, ipsi dixerunt quod per
significacionem ipsius sompnii aperte conicitur Vlixem per filium
exilio uel morti tradendum.
Cuius rei causa Vlixes ualde perterritus Thelemacum filium suum
capi fecit et eum mandauit fideli custodia detineri. Ipse uero
elegit sibi locum in quo posset secure manere in quorundam suorum
secretariorum fidelissima comitiua. Vallauit enim locum ipsum
muris altis et fortibus, ad quem non nisi per pontem quendam
uolticium haberi poterat accessus. Statuit eciam quod ad eum nullus
accederet nisi esset aliquis de suis secretariis supradictis.
Factumque est quod cum Ulixes dudum ex Circe quendam filium
suscepisset, Thelagonum nominatum, qui cuius esset filius a nemine
sciebatur preterquam a Cyrce sua tantummodo genitrice. Factus
est Thelagonus annorum xv, qui studiose querit a matre cuius fuerit
filius et si viuit pater et in quo loco moretur. Diu negauit
mater eum certificare de patre. Demum cum Thelagonus matrem
super inquisicione patris diuicis stimulasset, affecta tedio stimuli
filialis filio pandit et reserat regem Vlixem esse patrem ipsium et eum
de loco regni sui ubi moratur Vlixes diligenter instruxit. Thelagonus
autem in relacione matris est nimium factus letus. Desiderio
tamen nimio in vno fluctuat patrem suum uidere uelle, et ad
eum accedere desideranti animo exardescit. A matre igitur sua obtenta
licencia, que de celeri reditu rogat illum, Thelagonus se accinxit
|
|