quando sedebat ad ianuam regis et nolebat inclinare Aman.
Sed quid super his laborandum, cum teneamus Mardocheum de prima
transmigratione fuisse? Restat enim omnimodis, quod aut omnino
contemporanee fuerint iste due ystorie, aut quasi contemporanee,
designantes, quod regnum illud quod dicitur bestia et secta pseudo
prophetarum contemporanee erunt. Terminatis autem laboribus istis
erit Ierusalem nova in pace, quam interim edificari oportet in angustia
temporum. Diabolus autem erit incarceratus, et regnum obtinebunt
sancti. In fine autem temporum et annorum solvetur satanas
de carcere suo, et educet Gog cum exercitu suo, sicut Jezechiel
propheta et Iohannes circa fidem librorum suorum, ante quam tractent
de superna Ierusalem, aperte describunt. Et hoc quidem tali
consumari ordine poterit.
29. Manente Ecclesia Christi in pace, adversus reges quosdam,
qui erunt similes regum Persarum et Medorum, regnum aliud consurget,
quod dictum est in spiritu hircus caprarum, designatum in
regno Alexandri regis, atque ex hoc in nichilo ledetur Ecclesia, sicut
nec Alexander lesit Ierusalem, sed magis, etsi in falsa fide,
hostias tamen Domino in templo obtulit, et pacem illi stabilem firmamque
servavit. De quo videlicet hirco caprarum, etiam Merlinus
britanicus videtur facere mentionem, qui postquam locutus est de
quodam rege, quem et satis commendat, adiecit et ait: «sequetur
hircus venerei casti».
|
|