Bichilinus de Spelo: Pomerium rethorice

Pag 96


comparebit epistola, paratos nos offerimus ad eventum. Scientes quod,
Christi favente gracia, a vestre bonitatis mediante virtute multum honoris
et commodi prosequetur. Nam geritur de ipso summo Patre fiducia
quod ipse potestas semper erit promptus civitatis honoribus et tocius
communitatis commodis satis fidus.
 
5. De conclusionibus quantum ad consanguinitate iunctos
 
Spero namque de Illius gracia, qui graciarum est dator, subesse
sic efficaciter sciencie compescende laboribus, quod in filio fructificare
videbitur patris votum. Quam cicius igitur a studii fervore recesseris,
scias procul dubio nostre manus munere te privatum. Scientes quod
sic sollicite, sic attente scolastico labori me tradam, quod non solum
spe Dei letari poteritis, sed una cum amicis et proximis exinde percipere
commoda et honores.
 
6. De conclusionibus inter amicos et socios
 
Scientes quod, in quantum potencia se voto concesserit, circa vestros
honores et commoda promptus ero. Pro certo tenentes quod ex
unico servicio vobis erit pluritas debitorum. Attendentes quod, quidquid
ei feceritis gracie, nobis reputabimus fore factum. Scientes quod,
nisi hoc feceritis, non erit vobis~cara dileccio deprecantis. Scientes quod,
de vestra bonitate confisi, fore necesse non credimus ut vestre scripture
amplius percuciat stilus aurem. Scientes quod ad honorem amicorum
et statum mea dileccio est semper sollicita et non dormit. Hoc quoque
scientes, quod tempore presenti amicicia vestra non posset gracius
intimare.
 
7. Quantum ad amantes
 
Hoc quoque habentes indubie, quod, nisi michi subveniat vestra
dominabilis pietas, mortis periculum non evadam.
 
Capitulum V
 
DE SUBIUNCTIONIBUS
 
1. De adiunctionibus
 
Expeditis de hiis que de quinque presentibus epistole partibus
dicta sunt, consequenter de adicionibus est dicendum. Adicionem voco
hic quia contingit aliquando, facta epistola, vel quod sit alterius epistole,
vel per oblivionem vel aliquid de novo supervenit menti, illud
necessario adiungendum.

Torna all'inizio