Bichilinus de Spelo: Pomerium rethorice

Pag 21


4. Quomodo predicantibus Dei verbum
 
Evangelico viro et animarum sollicito zelatori fratri .P. ordinis Minorum;
vel sic: Christiane religioni multipliciter fructuoso fratri .M.
de Stella ordinis Heremitarum divini Verbi satori; vel sic: multa sapiencia
et sanctitate famoso fratri .C. de ordine Predicatorum, cuius
sacris monitis peccatores innumeri ad penitenciam revocantur, .H. salutem
et semper promereri graciam augendi numerum salvadorum. Religioso
et honesto viro fratri tali de tali ordine; vel sic: multe sanctitatis
et honestatis circumfulto insigniis fratri Thome, vel domino .P.,
si fuerit sacerdos ordinis Cisterciensis vel Camaldule, vel monacho
Sancti Benedicti in loco Sancte Crucis de Fonte Avellano talis salutem
et vere consciencie puritatem, vel salutem in Christo Iesu, vel in
Eo qui est omnium vera salus.
 
5. Qualiter scribitur hiis qui totaliter sunt dediti Deo
 
Lumine multe devocionis et oracionis inbuto fratri .C. de La Verna,
vel sic: plurima sanctitate acceptissimo apud Deum fratri .P.
commoranti in silva heremi Sancti Huberti talis devocionem in oracione
perfectam, vel antiqui hostis insidias superare, vel dominia pacis
melliflua contemplari, vel post huius vite cursum bravium recipere de
labore.
 
6. Quomodo abatissis
 
Eximie sanctitatis et honestatis; vel sic: fame laudabilis et vite
honeste domine .F. abbatisse Sancte Crucis, vel monasterii Sancte Clare
ordinis Sororum Minorum .T. priorissa in cenobio Sancte Iustine vere
salutis habitum, vel optate felicitatis gaudia cum salute; Christo Deo
devote sorori .M.; vel sic: Viro desponsate celesti; vel sic: devotissime
et honestissime domine .B. sorori in monasterio Sancti Pauli .R.
in monasterio Sancte Marie Nove salutem in Eo, cuius pulchritudinem
sol et luna mirantur; vel sic: Salutem in Eo, cui angeli serviunt et
assistunt, vel salutem et inimici temptantis insidias non perhorrescere,
vel divinum in temptacione levamen, vel habere semper pre oculis
spiritum veritatis, vel de spirituali naufragio ad portum provehi
peroptatum.

Torna all'inizio