quod ex distinctione finium predictorum sub pedibus vestris civitas ipsa
congaudeat, a vicinorum suorum antiquatis vexationibus liberata.
… domino pape rector Beneventi, per Leonardum de Benevento.
Ab olim predecessoribus nostris Beneventanos sentio scripsisse prelatos,
quos ad honorem ecclesie zelus intime fidelitatis accendit, conversationis
inhoneste materiam, que in monasterio Sancti Deodati Beneventani longis
a retro temporibus inolevit, ut oportuno remedio celeriter occurrere dignarentur.
Nunc autem inibi morantium superexcrescente lascivia, que propter
loci vicinitatem meis aperte subiacet oculis, vestre sanctitati scribere
compellor invitus, non quod in hoc meum singulariter interesse versetur,
sed civitatis Beneventane totius, cuius ad regimen meis non exigentibus
meritis ordinastis indignum. Nam cum ibi sint pauce moniales et iuvenes
et ad substentandas easdem monasterii non suppetant facultates, nec propter
utilitatem loci morature inibi mulieres accedant, que alicuius conditionis
honeste vel autoritatis existant, quarum predicte iuvenes ab illicitis
arceantur exemplo, adeo in conviventie vitio collaborant, quod nedum
videntibus, sed audientibus est orrori, sicut, ut autumo, ex inquisitione
facta per … cappellanum vestrum, vobis innotuit. Quarum mulierum
lascivitatis lubrico efficientem causam tribuunt ista tria: prima, palatii
curie tumultuosa vicinitas, quod ab ipso monasterio unius canne dimensione
non distat; secunda, quod habitationem secularium clericorum ab
|
|