librorum custos legat breue, qualiter praeterito anno fratres habuerunt
libros. Cum uero audierit unusquisque nomen suum pronunciari, reddat
librum, qui ad legendum sibi alio anno fuerat commendatus. Et qui
cognouerit se non perlegisse librum quem recepit, prostratus culpam
dicat et indulgentiam petat. Iterum praedictus librorum custos unicuique
fratri alium librum tribuat ad legendum. Distributis per ordinem libris
praefatus librorum custos in eodem capitulo inbreuiet nomina librorum
et eos recipientium. Si hac die festiuitas duodecim lectionum euenerit,
legantur duae lectiones in capitulo, una de euangelio et altera de obseruantia
Quadragesimae; altera statim legatur post alteram. Lecta posteriore
lectione tunc primum dicat lector Tu autem domine . Ipsa die incipiant
preces Oremus pro omni gradu aecclesiae ; psalmos prostratos, id est, septem
poenitentiales et septem primos graduum, binos quidem, unum hinc et
alterum inde per singulas horas usque ad Uesperas; ad Uesperas uero
quatuor cum capitulis et collectis pro peccatis adiungentes in fine Et ad
beneficia recolenda, quibus nos instaurare dignatus es, tribue uenire gaudentes .
Hac die incipiant absconsam portare ad secundam tantum lectionem.
Tribus diebus, id est, secunda feria, quarta et sexta usque ad Pasca nec
pulsetur tabula post capitulum nec loquantur in claustro.
<DE FERIIS POST DOMINICAM PRIMAM QUADRAGESIMAE>
Quarta et sexta feria post Sextam, antequam de choro exeant, dicant
Deus auribus nostris . In his duabus feriis post Nonam sedeant in claustro
factoque paruo interuallo pulset secretarius unum de mediocribus signis.
Tunc discalcient se omnes et lauent manus ueniantque in chorum et
facta oratione inchoet infans antiphonam Exsurge domine adiuua nos .
Pulsentur duo signa, dicat sacerdos Ostende nobis domine , subsequantur
Kyrieleison. Pater noster . Psalmus quarta feria Deus misereatur nostri , sexta
feria Deus in adiutorium meum . Item sacerdos Et ueniat super nos . Oratio
pro peccatis. Postea inchoet cantor antiphonam et eant ad processionem.
Letania ut supra. Ad hanc processionem nullus uadat calciatus nisi
sacerdos et leuita. Si quis pro aliqua infirmitate nudis pedibus ire nequiuerit, |
|