quod vos fratres Minores et Predicatores estis in odium et in
scandalum clericorum et secularium sacerdotum. Altera die comedebam
cum episcopo Furliviensi, et erant ibi multi clerici et sacerdotes
cum eo pariter comedentes; et multa mala dicebant de
vobis, que notavi diligenter, ut scirem vobis referre, ad cognoscendum
si de illatis iniuriis, quas iniurias dicunt, scitis vos excusare
necne. Primum de quo conqueruntur est quod vos non
predicatis quod decime dentur eis. Secundum, quod vos recipitis
sepulturas, id est quod sepelitis corpora defunctorum.Tertium,
quod vos auditis confessiones suorum parochialium contra
voluntatem eorum. Quartum, quod vos ita usurpastis vobis
predicationis offitium, quod locum habere non possunt, quia
populus contemnit eos audire. Quintum, quia cum vestris conventualibus
missis ita impeditis eos diebus sollemnibus, quod
oblationes habere non possunt. Sextum, quod vos estis magni
doniatores, id est libenter loquimini cum dominabus et eas aspicitis,
quod est contra Scripturam». Tunc respondi et dixi: «Vultis
plus dicere?». Et ait: «Bene sufficiunt modo ista».
Qualiter satisfeci Matulino de iniuste nobis illatis, et accepit satisfactionem,
et factus est michi grandis amicus et intimus atque fidelis.
Tunc dixi: «Beatus Gregorius in Pastorali sic dicit: 'Sunt
nonnulli qui, dum extimari ebetes nolunt, sepe se in quibusdam
inquisitionibus plus quam necesse est exercentes, ex nimia subtilitate
falluntur'. Beatus etiam Ieronimus dicit: 'De alieno malo
non coinquines os tuum. Tua vitia, non aliena attende. De tua
ergo correctione esto sollicitus, et quod ad te non pertinet querere
noli'. Hec verba pro te, Matuline, sunt dicta. De Liviensi
autem episcopo noveris quod religiosos non diligit, et ideo per
consequens nec ipse a Deo diligitur, quia Dominus dicit: Qui
vos spernit, me spernit; et qui vos odit, me odit. Et Apostolus dicit,
Ro. VIII: Si Deus pro nobis, quis contra nos? Inde beatus Iob,
XVII, dicit: Libera me, Domine, et pone me iuxta te, et cuiusvis
manus pugnet contra me. Sunt enim nonnulli, sicut dicit beatus
|
|