duorum bonorum hominum legalium de Ripperia assumendorum
de conscilio consciliariorum Ripperie, dampnum passo per homines
comunitatis illius ville in cuius loco vel territorio predicta missa
fuerint; a qua pena ipsa villa liberetur si malefactorem infra
mensem predictum assignaverit in manibus castellani. Quod si
dicta villa duodecim focorum vel pauciorum fuerit, villa propinquior
ad contributionem cum suis facultatibus teneatur, medietas cuius
dampni solvatur per capita cursorum et alia medietas pro soldo et
libra.
XXVIII. DE PENA VENDENTIUM VINUM POST SONUM
CAMPANE ET EUNTIUM PER TERRAM.
ITEM quod nullus vendat vinum post sonum campane, nisi ad
portandum extra tabernam in vaxe alieno, qui vero contrafecerit
solvat soldos decem imperialium, bibens vinum predictum vel
emens solvat soldos decem imperialium, exceptis iacentibus in
ipsa taberna. Qui vero post dictum sonum campane, de nocte, sine
lumine vel sine licentia castellani vel consulum, qui possint ipsam
licentiam impetrare a castellano hominibus habentibus bonam
famam et ex iusta causa, ambulaveri(n)t, exceptis custodibus
locorum, solvat soldos duo imperialium; si vero habuerit arma
solvat soldos decem imperialium et perdat arma.
XXVIIII. QUOD MULIER NON ORIUNDA IN INSULA IN
DICTA INSULA NON MORETUR.
ITEM quod in Insula de cetero non moretur aliqua mulier, que
non sit inde oriunda vel ibi nupta aut mater, filia, soror vel honesta
pedisecha laici habentis ibi perpetuam mansionem; alioquin
mulier que contra hoc statutum moraretur et quicumque ipsam in
domo receperit aut aquam aut ignem ei dederit, bannum soldorum
.XL. imperialium componat et nichilominus turpiter dehonestata
heiciatur de loco Insule.
|
|