<DE ORDINE DIURNO IN FESTIUITATIBUS>
In crastino ante Nocturnas Uigilias ad excitandos fratres pulsentur omnia
signa, dehinc gradatim duo et duo, ad extremum omnia. Ad inuitatorium
quatuor in cappis. Terna responsoria in tribus nocturnis duo et duo,
quartum quatuor, octauum quinque, duodecimum sex canant. In tribus
nocturnis dum legitur tertia lectio, duo sacerdotes cappis induti incensent
altaria maius et minus, dehinc ferant abbati et priori et caeteris fratribus
per ordinem. Octauum et duodecimum responsorium post Gloriam
a capite repetantur. Pronuntiato euangelio altare discooperiatur et omnia
luminaria accendantur. Ad Te deum laudamus duo maiora signa pulsentur.
Lecto euangelio, collecta dicta, pulsatis omnibus signis inchoet sacerdos
Matutinas Laudes; dehinc in uestiarium reuersus casulam et stolam
deponat et sic in alba cum manipulo in chorum redeat. Incepto ymno
exeat, manipulum deponat, cappam induat et cum alio fratre similiter
induto sicut ad hesternas Uesperas cum thuribulis per altaria uadat
duobus conuersis cum eis indutis in albis. Si abbas euangelium legerit,
post euangelium indutus cappa in chorum reuertatur. Antiphona ad
Benedictus ter dicatur. Ad Primam duo maiora signa pulsentur. Tres
cerei ante altare accendantur, similiter ad Terciam et Sextam et Nonam;
capitulum breuiter peragatur.
Missa matutinalis cum una collecta et praefatione dicatur. Dum sacerdos
in canone est, remanentibus infantibus cum magistris suis in choro, qui
ante missam debent esse induti, caeteri pergant induere se, qui accipientes
a secretario uestimenta extra secretarium se induant. Si uero locus paruus
est, exeant aliqui in claustrum uel capitulum et ibi induant se. Meliores
uero albae tribuantur prioribus et honestioribus personis. Unusquisque
mox ut indutus fuerit, reuertatur in chorum. Missa peracta si dies
dominicus non fuerit, cessante maiore signo, quod incepta ultima
collecta missae pulsari coepit, fiat oratio Terciae. Post orationem pulsato
alio signo cantetur Tercia.
<DE DOMINICO DIE>
Si uero dies dominicus fuerit, expleta matutinali missa, non pulsato
adhuc Terciae signo fit aqua benedicta, sicut aliis dominicis diebus fieri
solet; dum cantat Asperges me , pulsetur maius signum ad Terciam.
Aspersa aqua benedicta uadat sacerdos per officinas cum portitoribus |
|