Richardus Venusinus: De Paulino et Polla

Pag 126


Si monachus fuerit expers vacuusque timoris,
Claustrum, contempta religione, fugit;
Ni violare viri lectum bona nupta timeret,
Iam fieret meretrix, nomen habendo malum;
Constructa miles acie nisi iussa regentis
Pertimeat, perdi concito pugna potest;
Ni timor in navi fuerit, dux ut timeatur,
Attinget portus vix ratis ulla suos;
Urbibus in cunctis ubi non timor esse videtur,
Magna procul dubio dampna venire solent;
Iussa Dei nostri metuisset si prothoplaustus,
Non gustasset homo pocula dira necis.
Denique si nimius timor orbem non cohiberet,
Cessarent leges, pax probitasque simul.
Res est sancta timor: reprobos ligat, arcet iniquos,
Ad frugem vite dans melioris eos.
Sed tamen audivi quoniam servilis avaris
Est timor; hunc debet mittere quisque foras;
Multus in illorum loculis thesaurus habetur
Quem ne contingant hic timor arcet eos:

Torna all'inizio