probaris personae. Non certe dualitas in persona unigeniti sed in
naturarum constat distinctione. Vnigeniti nempe nomen et ante
saecula ex patre et post uirginis partum permanet sempiternum ex
matre. Persona namque unigeniti substantiam alterius generis adsumpsit,
non alterius filii nuncupationem, quoniam Christus Iesus
heri et hodie ipse et in saecula, hoc est indemutabilis permanens qui
erat et qui est et qui uenturus est omnipotens. Qui cum in forma
dei esset, formam serui suscepit, id est hominis naturam. Non
personae sed naturarum est discretio geminata. Permansit idem
quod erat, hoc est unigenitus dei filius, unigenitus eo quod unus
sit. Quis putas, quaeso te, catholicorum hominem Christum Iesum
uerum deum uerumque dei filium confiteretur, si homo tantummodo
solitarius et non in singularitate personae inseparabiliter deus
et homo ueraciter perseueraret? Non utique ademit uel minuit aut
demutauit homo adsumptus plenitudinem diuinitatis, sed per
diuinitatis plenitudinem in Christo corporaliter inhabitantem exaltatus
est homo Christus Iesus in deum, ita ut unus idemque sit deus
homo dei hominisque filius, salua tamen proprietate utriusque
inconfusa naturae. Ingrauatumque est cor tuum etiam hac uice,
quatenus, exinanita in cunctis adinuentionibus tuis qualicumque
fidei tuae fruge, impleaturque in te propheticum illud lamentatricis
editum uocis uaticinium, dicentis: Residuum erucae comedit locusta
et residuum locustae comedit brucus et residuum bruci comedit rubigo.
Adtende quid sequitur: Expergiscimini subinfert ebrii et flete.
Auxisti quin potius supra pondus peccati plumbi talentum, ita ut
non te pudeat dicere infirmitatis obligatum necessitate Christum
Iesum pro se quantotius exorasse. Et idcirco deus uerus credi non
posse causaris, qui necessarium habuit pro se etiam orare. De
quibus latius supra iuxta exilis intellegentiae meae mensuram, ut
ipse, de quo loquimur, largire dignatus est, disputasse me non
abnuo.
I 37 (I 56) Hoc igitur Pauli testimonium tuis, ut ita dicam, usus
in medium uerbis deductum, quia de domino Iesu Christo prophetico
adsumpto oraculo docuerit: Tu es sacerdos in aeternum secundum
ordinem Melchisedech, et adiecerit: Qui in diebus inquiens
|
|