in proximo tua dilectio non ignoret'. (7) Commutatur etiam in casualem dictio carens casu. Ecce, si velis dicere: 'Hic bene iudicat', ita poteris commutare: 'Hic est bonus iudex' vel: 'Hic iudicat bono modo' vel: 'Hic servat in iudicio bonitatem'.
9. (1) DE IPERBOLICA AMPLIATIONE.
(2) Tertium genus ampliandi materiam est comparatio que in rethoricis superlatio nominatur: et hec ampliando materiam sepe loquitur yperbolice. (3) Huiusmodi autem comparationibus sepe utuntur autores materiam ampliare volentes. Et fit quandoque iperbole cum signo comparationis expresso, scilicet per magis, minus et eque, (4) quandoque fit separatim, id est sine aliquo signo comparationis, ut: 'Totus Aristotiles est in pectore tuo'.
10. (1) DE APOSTROPHA.
(2) Quartum genus ampliandi materiam est apostrofa que dicitur exclamatio. (3) Hec enim per quandam sermonis directionem efficit doloris aut indignationis alicuius significationem, ut: 'Tu Iuda impiissime ausus fuisti magistrum et Dominum prodere osculando'. (4) Potest etiam et apostrofa intervenire causa monendi et sepe alterius causa rei.