Pronuncietur euangelium et ex eo sermo agatur. Post Sextam facto
interuallo pulsetur signum, conueniant fratres in aecclesiam, orationem
communiter faciant; letania minime dicatur. Induantur missam celebraturi,
sacerdos honorifice, leuita dalmatica, duo subdiaconi tunicis
unus ad prophetiam et alter ad epistolam, duo albis ad responsorium,
cantor ebdomadarius cappa ad chorum, tres conuersi, unus ad thuribulum,
duo ad candelabra. Pulsetur classicum; ad canonem supra formas
prosternantur; tabulae refectorii coopertae.
IN NOCTE DOMINICAE NATIUITATIS
Omnia signa primum pulsentur. Ad inuitatorium quatuor fratres in
cappis. In unoquoque nocturno ad terciam lectionem duo sacerdotes
cappis induti duo thuribula circumferant, primo duobus altaribus maiori
et matutinali dehinc fratribus in choro sedentibus. In tercio nocturno
pronuncientur euangelia haec: Liber generationis . Exiit edictum . Pastores .
In principio . Quibus expletis cum responsoriis suis incipiat dominus abbas
Te deum laudamus . Quo dicto legat euangelium Liber generationis . Dicta
oratione incipiat cantor antiphonam O beata infantia . Quam canentes eant
ad altare sanctae Mariae et ibi dictis Matutinis de Omnibus Sanctis
uadant in dormitorium. Deinde pulsetur unum de maioribus signis,
sicut pulsari solet skilla in duodecim lectionibus post capitulum ante
matutinalem missam. Tunc fratres qui ad missam induendi sunt uadant
ad locum constitutum, ubi sit optimus ignis a famulis camerarii praeparatus,
baccilia quoque et manutergia et aqua calida ad abluendas |
|