19. AMBROS. Estote sicut ego . Eram, inquit, et ego
sub lege; sed post elegi extra legem vivere, sicut et
vos per eam quae in Christo est fidem vivebatis.
Imitamini ergo et vos me cum illa quae in Christo est
fide, a conversatione legitima vosmetipsos extraneos
facientes.
20. LANFR. Estote sicut ego , id est, conformamini
meis moribus, quia ego conformor vestris. Vel estote
fideles, sicut ego sum, quia ego infidelis fui sicut et
vos; ac per hoc me imitamini, quia ego priorem
fidem non sine causa deserui.
21. Quia et ego sicut vos . Diceret quis: Quomodo
possumus esse ut tu? Respondet: Potestis, quia
sicut sumus idem in substantiali essentia, possumus
esse in accidentali, id est, in sanctitate.
22. Nihil me laesistis . Ne quis diceret Apostolum
ex invidia eos arguere, removet sic: Non me laesistis,
quod debeam invidere vobis; sed omnia bona
mihi fecistis, quia amicus factus. Hoc loquor vobis,
quia amicus sum vobis, et quia verum est.
23. Per infirmitatem , id est, in infirmitate, sicut
et per illud tempus, id est, in illo tempore.
24. Tentationem . Tanta fuit infirmitas carnis in
Apostolo, ut auditores tentari possent, et putare
quod Apostolus Christi non esset, qui ita aegrotare
permitteret.
25. AUGUST. ( in Epist. ad Gal. ) Tentationem . Tentati
sunt, cum persecutionem pateretur Apostolus;
utrum timore desererent eum, an charitate
amplecterentur.
26. LANFR. Non sprevistis , etc. Potuissent illi, videntes
Apostolum affligi, spernere praedicationem
ejus, sed non spreverunt, et putare Deum non curare
illum qui sic affligebatur.
27. Ergo beatitudo vestra . Beatitudo illis erat
Apostolum diligere, et praeceptis ejus in omnibus obedire;
sed hanc beatitudinem quidam illorum perdiderant,
qui ad culturam daemonum redire et eis servire
volebant.
28. AUGUST. ( ibid. B.) Verum dicens . Sed quid
verum praedicans, nisi ut non circumciderentur?
|
|