58

Canis, Marzuccus Gaetani et Albertus Bulsi, nobiles cives Pisani, vexilliferi fuerunt: de quo
bello VII Lucensium milites capti fuerunt, et duo interfecti, et dextrarii XX capti, et ab utraque
parte occisi quem plures et vulnerati; de Pisanis autem milites tres capti fuerunt. Eodem
die, Pisani cum laude Pisas redierunt. Altera vero die, incole predictorum castrorum et
consortes, nominate castella Lucensibus reddiderunt, et illi Monte Gravente igne cremaverunt,
et Bozanum retinuerunt.
A.D. MCLXXIII. Ianuenses occulte cum octo galeis et manganis iverunt in Planosam,
et obsederunt castrum de Planosa, et cum illud cum predictis meniis oppugnarent et capere
per vim non valentes, tandem incole timentes devastationem terre, pro honore Ianuensium,
se Ianuensibus XVI kal. octubris reddiderunt, qui eis magnis securitatibus promiserunt nullum
dapnum nec in personis nec in havere facere: qui minime observaverunt, immo castrum
usque ad fundamenta dexstruxerunt.
A.D. MCLXXIII, mense Octubris. Pisani tres galeas armaverunt et per insulas Corsice
et Sardinee navigaverunt, et duas naviculas Ianuensium ceperunt. Ianuenses,hec audientes,
V galeas armaverunt, et post predictas Pisanorum galeas navigaverunt, et eas in portu Sancte
Lucie nocte invenerunt. Pisani vero putantes plures galeas esse, relictis galeis, in terra satis
vilissime fugierunt, quas galeas Ianuenses ceperunt, et sic cum triumpho Ianuam redierunt.
A.D. MCLXXIII. Indictione VI, mense Decembris. Cristianus cancellarius, cum magno
exercitu militum et peditum et sagittariorum Senensium et comitis Guidi, ad devastandam
terram comitis Ildebrandini perrexit, et duo ipsius castella cepit. Quod Pisani audientes,
citissime CL milites cum sagittariis preparaverunt, et in eius auxilium viriliter direxerunt.
Predictus Cancellarius, sciens Ildebrandinum comitem satis habundanter ad pugnam preparatum,
pugnam facere recusavit, et cum toto exercitu suo exivit de terra dicti comitis, et in
districtu urbis Rome profectus est: unde Pisani magnam laudem habuerunt.
A.D. MCLXXIII, mense Decembri. Filii Veltri et Iafferrus fecerunt pacem et securitatem
cum Lucensibus et iuraverunt facere guerram Pisanis cum tota eorum fortia, multa
pecunia eis a Lucensibus promissa; et Lucenses iuraverunt eis destruere roccas de Corvaria.
Lucenses vero, cum predictas roccas destruere cepissent, Curradus dictus Iamferri et filius,
cum quibusdam suis fidelibus, satis ingeniose satis cause turrem novam predictarum roccarum
Nonis Ianuarii recuperavit, et intravit expulsis inde Lucensibus. Pisani hec audientes, cum
una galea et buthis iam dictam roccam cum edificatoribus eam succurrerunt, et eam variis
machinis munierunt, et sic eam viriliter tenuerunt, unde Lucenses magnum dolorem habuerunt.
A.D. MCLXXIIII. In consulatu Ruberti quondam Petri Pagani, et Gaitani Burgundionis
et sociorum, novem galee, pro guardia facienda, nove facte fuere, et in eorumdem
consulatu quidam ex nobilibus Pisanorum civibus galeas super Ianuenses viriliter armaverunt;