Cap. XXII.
Regi Francorum, existenti in partibus ultramarinis,
ut rescribat ei sui status et continentiam
et processus.
Generali qua cunctos amplectimur fidei
participatione Christicolas, sed speciali
qua vestram pura diligimus affectione
personam, inter diversa tot et tanta curarum
genera, quae cogitationibus nostris indesinenter
occurrunt, praecipua reddimur cordis
anxietate solliciti, et affectamus instanter de
vobis audire veridica nova, quae placeant, et
scire plenarie in Terrae sanctae subsidium, vestrae
peregrinationis eventum, velut qui [teste
Summo judice] semper ipsam amore negocii
desideravimus prosperam, et affectione personae
semper votorum conformitate felicem. De
cujus etiam aggressione negocii, velut in tam
valida rerum et temporum tempestate tentata
[res quippe solliciti plena timoris amor, quem
ad progenitores vestros, et vos habuisse suaviter
memoramur illaesum] timidos nos crebro
reddit, et multotiens etiam dubitare coegit,
ne votis communibus absonum infestis
auspiciis exitum sortiretur. Inter has siquidem
anxietates et sollicitudines, quas eventus
futuri dubietas nostris affectibus ingerebat,
volatilis famae garrulitas, variis discussa relatibus,
supervenit: quae veritatis utinam vacuas