eis, et ut hi quos ordinavit Dominus de Evangelio vivere, eo quod
Evangelium annuntiant, libere de Evangelio vivere possint. Saccati
vero obedientes fuerunt summo pontifici, et inde laudantur
et precipue commendantur, quia in aliis religionibus bene possunt
salutem propriam operari vel saltem ubi sunt, dummodo, secundum
quod concessum est eis, alios sibi similes non recipiant, donec
penitus ad nichilum reducantur, sed sic deficiant in se ipsis. Isti
vero stulti, bestiales et ydiote, qui se apostolos appellant, nullatenus
obedire disponunt, sed faciunt vestimenta habitus sui et
ponunt seorsum in oculis intrare volentium et dicunt eis: «Non
audemus vos recipere, quia prohibitum est nobis. Vobis autem
prohibitum non est, et ideo facite quod vobis videtur». Et ita
creverunt et multiplicati sunt super numerum, nec quiescent nec
cessabunt a stultitia sua, donec aliquis summus pontifex indignetur
contra eos et deleat eorum memoriam desub celo. Nam
summis pontificibus Romane curie obediendum est, quia Dominus
dicit, Luc. X: Qui vos audit me audit, et qui vos spernit me
spernit. Qui autem me spernit, spernit eum qui me misit. Hinc Apostolus
ait, prima ad Thessa. IIII: Itaque qui hec spernit, non
hominem spernit, sed Deum. Non ergo videatur leve peccatum
inobedientia his qui obedire contemnunt, quoniam propter inobedientiam
Adam perdidit paradisum, Saul regnum, Salomon amorem
divinum. Sauli namque a Samuele dictum fuit, I Reg. XV:
Numquid vult Dominus holocausta aut victimas, et non potius ut
obediatur voci Domini? Melior est enim obedientia quam victime,
et auscultare magis quam offerre adipem aríetum, quoniam quasi
peccatum ariolandi est repugnare, et quasi scelus ydolátrie nolle
acquiescere.
Secunda ratio est quia aliqui eorum non servant castitatem,
ad quam omnes religiosi tenentur, quam etiam Dominus docuit
verbo et monstravit exemplo. Verbo docuit, cum dixit, Luc.
XII: Sint lumbi vestri precincti, et lucerne ardentes. Ubi Gregorius
dicit: «Lumbos quippe precingimus, cum carnis luxuriam per
continentiam coartamus». Exemplo monstravit, quando se circumcidi
fecit. Ubi beatus Augustinus dicit: «Circumcisio Christi
quid est nisi castitas nostra, qua Deus delectatur in novissimis
|
|