V.
Imperatoris ad dominum papam.
REUerendo et in Christo plurimum metuendo patri et domino Eug(genio) Dei gratia totius sancte ecclesie summo pontifici Cor(radus) Dei gratia Romanorum imperator debite reuerentie famulatum. Lator presentium, Aretine maioris ecclesie archidiaconus, qui pro eiusdem ecclesie grauaminibus presentiam uestram uidere ardenti uoto desiderat, ut pro eo uobis scribere cogeremur, precibus impetrauit. Cuius rei gratia, pater in Christo karissime, sanctitatem uestram plurimum deprecamus, quatinus suis iustis petitionibus uestre pietatis animum inclinetis et suam ecclesiam immo uestram in Domino a prauorum excessibus uestri priuilegii pagina defendatis, ut in ea Domino fratres seruire uolentes diuina officia quiete ualeant celebrare.
VI.
Responsiua eiusdem.
Eug(enius) episcopus seruuus seruorum Dei dilecto in Christo filio Cor(rado) Dei gratia Romanorum imperatori semper augusto salutem et apostolicam benedictionem. Quonaim ex officio nobis a Deo apostulatus inuncto omnibus ecclesiis debitores existamus, illis tamen pro quibus tuas nobis preces dirigis, propensiori cura nos conuenit prouidere. Dilectus filius noster M. sancte Aretine ecclesie archidiaconus, pro quo nos plurimum rogauistis, ad nos uenit et suis iustis petitionibus satisfacientes qualiter eum pro amore tuo debita benignitate tractauimus, idem tibi poterit manifeste notare. Quia igitur ad te specialiter pertinere cognoscitur, Dei ecclesias sollicita cura defendere, per presentia scripta tibi plurimum rogando mandamus, quatinus prefatam ecclesiam manuteneas et ab illicitis grauaminibus protegere filiali deuotione procures. Nam si sancta loca tueri filiali affectione malueris, tuum regnum in sua stabilitate ueraciter permanebit.
|
|