ne aliqua mala opera ibi fierent, asserendo se senper stare ad mandata ecclesie
romane. Similiter et alie civitates eiusdem provincie dicebant.
Dicto tenpore dominus Petrus Saracenus episcopus vicentinus, qui erat legatus generalis
apostolice sedis in ipsa provincia, separavit se de civitate Ravenne, quanquam ibi nullam
habuit lesionem, et ivit Cesenam: postmodum ivit Forlivium, et predicti iudices generales
similiter iverunt Forlivium, ibique steterunt per plures dies.
Dictus vero legatus, volens civitatem Forlivii ad mandata ecclesie retinere, in suis parlamentis
dabat crucem omnibus volentibus ibi stare, et remissionem magnam omnibus faciebat,
qui stabant ad defensionem civitatis eiusdem.
Dicto tenpore, die mercurii XX mensis decenbris ineunte, predicti domini Maghinardus
et Lanbertus rectores civitatis Faventie, cum maximo guarnimento congregato in ipsa
civitate Faventie, et dominus Guido de Polenta cum illis de Ravenna, et dominus Malatesta
cum illis de Arimino et eius comitatu, et Malatistinus potestas Cesene cum illis de Cesena, et
illi de Cervia et de Forumpopilio et de Bretenorio, et Thosolinus de Abete, cum toto eorum
exforcio et potentia et guarnimentis eorum hinc inde congregatis, eques et pedes, equitaverunt
versus civitatem Forlivii, ita et taliter quod, dicta die mercurii, in mane, fuerunt omnes
predicti, cum eorum guarnimentis et armis, iusta civitatem Forlivii, a latere de suptus ipsius
civitatis, intrantes, quasi una hora, ipsam civitatem, aliqui ex eis per portam sancti Blaxii, et
aliqui per portam sancti Petri, non inferendo aliquam ofensam nec danpnum alicui persone
de ipsa civitate Forlivii, assumentes dominium civitatis ipsius, facientes eligi in potestatem
ipsius civitatis Ugolinum cui dicitur Cignatta, et dominum Guidonem de Polenta in capitaneum
populi Forlivii: ille vero dominus legatus et iudices predicti et omnes eorum stipendiarii, ea
die, separaverunt se de ipsa civitate.
Die vero iovis tunc proxime sequenti, predictus dominus Maghinardus, in mane, tenpestive,
cum Faventinis et forensibus, quos secum habebat, pedes et eques, equitavit supra quoddam
castrum Francisci de Manfredis, quod vocabatur Bachagnanum, ibique posuit exercitum ad
expugnationem ipsius castri; fecitque ibi construi et edificari aliud castrum, in quo posuit
custodes ad hoc, ut illi de Bacagnano non possent exire extra, et unum manganum ibi
posuit, quod iactabat in Bacagnanum. Item fecit edificari unum aliud castrum ex alia parte
fluminis Alamonis, ibique posuit custodes ad hoc, ut illi, qui erant in Bacagnano, non exirent
extra; postmodum vero dictum castrum Bachagnani datum fuit in custodiam domini comitis
Romaniole.
M.CC.LXXXXI, indictione quarta, dominus Lanbertus filius domini Guidonis de Polenta
electus est potestas Faventie, et dominus Maghinardus de Sosenana electus est capitaneus
populi Faventie, quilibet eorum pro sex mensibus, et intraverunt regimen ipsorum die primo
mensis ianuarii.
Dicto anno venit ad castrum Castrocarii dominus comes Aldrebandinus de Romena episcopus
aretinus, in provincia Romaniole comes et generalis rector pro sancta romana ecclesia.
Item, die lune XXII ianuarii, venit ipse dominus comes ad civitatem Forlivii.
Item, die martis statim sequenti, venit ad civitatem Faventie, ubi fuit receptus cum honore
maximo et triunpho.
Dictis vero diebus, omnibus et singulis preteritis, predictus dominus comes, una cum anbaxiatoribus
|
|