LII. De lupis et ouibus.
Pugna lupis opponit oues, ouiumque satelles
Est canis, est ueruex: hac ope fidit ouis.
Palma diu dormit, desperat turba luporum
Et, simulans fedus, federe temptat ouem.
Fedus utrumque fides iurato numine fulcit,
Id lupus, id simplex obside firmat ouis,
Datque lupis, male sana, canes, recipitque luporum
Pignora; nec metuit nec sua damna uidet.
Cum natura iubet natos ululare lupinos,
Turba lupina furit, federa rupta querens.
Ergo pecus, tutoris egens, in uiscera mergit:
Preside nuda suo sic tumulatur ouis.
Tutorem retinere suum tutissima res est:
Nam si tutor abest, hostis obesse potest.
|
|