Fordicidis boves fordae, id est gravidae, immolabantur,
dictae a fetu.
Foedus appellatum ab eo, quod in paciscendo foede hostia
necaretur. Virgilius(Aen. 8,641): “Et caesa iungebant foedera
porca.” Vel quia in foedere interponatur fides.
Forcipes dicuntur, quod his forma,id est calida, capiuntur.
Forbeam antiqui omne genus cibi appellabant, quam Graeci
phorben vocant.
Faedum antiqui dicebant pro haedo, folus pro holere, fostim
pro hoste, fostiam pro hostia.
Furvum nigrum, vel atrum. Hinc dicta furnus, Furiae, funus,
fuligo, fulgus, fumus.
Fodare fodere.
Forctes, frugi et bonus, sive validus.
Forum sex modis intellegitur. Primo negotiationis locus, ut
forum Flaminium, forum Iulium, ab eorum nominibus, qui
ea fora constituenda curarunt; quod etiam locis privatis et
in viis et agris fieri solet. Alio, in quo iudicia fieri, cum
populo agi, contiones haberi solent. Tertio, cum is, qui provinciae
praeest, forum agere dicitur, cum civitates vocat
et de controversiis eorum cognoscit. Quarto, cum id forum
antiqui appellabant, quod nunc vestibulum sepulchri dicari
solet. Quinto, locus in navi, sed tum masculini generis est
et plurale [est]. Sexto fori significant et Circensia spectacula,
ex quibus etiam minores forulos dicimus. Inde eti forare,
foras dare, et fores et foras et foreculae, id est ostiola,
dicuntur.
Fons a fundendo dictus.
|
|