Pag 288

et subiugavit sibi totam Campaniam praeter Fummonem, et castrum Ferentinum obsedit
per novem dies, et ivit super Guarginum; ibi commissum est bellum inter Teotonicum
militem et Latinum nomine Malpenza, et superatus est miles Teotonicus a milite Latino
vidente et astante rege cum toto exercitu in circuitu. Quidam comes nomine Henricus
Roccisburgae de fidelibus regis, discedens a rege cum magna parte exercitus regis, fregit
securitatem Babuco et terrae Pufanae, et abstulit omnem robbam et; animalia omnia, quae
in Babuco et in terra Pufana invenit. Et rex habuerat fodrum ab ipsis castellis, hospitatus
est in pede castri per novem dies, omnibus tam ecclesiis quam castellis per circuitum
omnia mala quae inferre et facere potuit fecit. Ceperanum reddidit Riccardus Reberi.
Peccatis exigentibus capta est terra Ierosolimitana a Saracenis.
1187. ind. 4. Gregorius VIII. sedit mense 1, diebus 27. Hoc anno Lanterius Mediolanensis
miles erat ballivus per totam Campaniam, et tenebat in sua potestate roccam de
Lariano et castrum. Cognita morte Urbani papae et sui patrui Mediolanum redire volente,
ad notitiam domni Iordani abbatis Fossae novae pervenit; unde ipse domnus Iordanus considerans,
ne ad curiam Romanam de supradictis roccis eveniret perdendi impedimentum,
convenit ipsum Lanterium amicabili pacto, et dedit ei .... libras provendiensium. Postea
domnus Iordanus praecepit praedictas roccas in sua cura, et conservavit integras, et assignavit
Clementi papae.
1188. ind. 5. Hoc anno Clemens III. sedit annis 3, mensibus 3, diebus 27. Domnus
Iordanus abbas Fossae novae 4. Idus Martii ordinatus est diaconus cardinalis; 4. Nonas
Aprilis consecratus est presbyter cardinalis tituli pastoris Sanctae Pudentianae. Mense
Iunii missus est in legatione Alamanniae. 8. Idus Novembris Mobilia filia Landulfi de Ceccano
data est in uxorem comiti Iacobo de Tricarico. 5. Idus Novembris combusta est Tecclena
a populo Ferentino.
1189. ind. 6. Hoc anno domnus Iordanus cardinalis reversus est de legatione Alamanniae
et applicuit Ceccanum in vigilia sancti Petri 11. Kal. Iulii. Et imperator Fridericus
in festo sancti Georgii coepit ire ultra mare cum maximo exercitu ad expugnandum Saladinum,
qui ceperat terram Ierosolomitanam et tenebat eam in sui dicione. Et perrexit
per Hungariam et Romaniam, ubi multa mala operatus est. Iohannes de Ceccano accepit
in uxorem Rogasiatam filiam comitis Petri de Celano. Mense Novembris Guilielmus rex
Siciliae absque haerede, quod magnum periculum fuit, mortuus est. Et sic omnes archiepiscopi
episcopi abbates et universi aulici comites Siciliae invicem convenientes, elegerunt
comitem Tancredum, et honorifice in regem coronaverunt.
1190. ind. 7. 10. Kal. Ianuarii Iohannes de Ceccano gladio militiae accinctus est.
8. Idus Maii comes Bertoldus legatus imperii Alamanniae ingressus est regnum Apuliae
cum magno exercitu, et ivit usque ad Arianum. Cui obviantes comes Riccardus de Cerra
et Iordanus Petri Leonis Romanus cum exercitu regis Tancredi, mense Septembris praedictus
comes Bertoldus ultra proficere non valens, sua voluntate exivit de regno. 6. Idus
Septembris domna Aegidia peregre profecta est ad Sanctum Iacobum.
1191. ind. 8. Henricus imperator imperavit annis quinque et mensibus 6. 3. Kal.
Maii ingressus est regnum Apuliae, obsedit civitatem quae dicitur Arcis, alio die cepit
eam, et incendit cum rocca, et de castello Arcis eiecit castellanum Mazzeon Burellus
cum omnibus Latinis, et sic omnis terra redacta est in sui potestate usque Neapolim, et
cum magno et innumerabili exercitu ipsam civitatem circumdedit et obsedit, et cum multis
et diversis machinis eam debellavit.
1191. ind. 8. Coelestinus III. sedit annis 7, mensibus 9. 7. Kal. Martii domna Aegidia
de peregrinatione prospere regressa est. Episcopus Rodulfus Ferentinus 5. Kal. Martii
mortuus est 18. Kal. Madii rex Henricus cum coniuge sua Constantia in ecclesia beati
Petri a Coelestino papa imperialem coronam acceperunt 3. Kal. Madii.
1192. ind. 9. Hoc anno Diopuldus post reversionem imperatoris in Alamanniam coepit
infestare regnum. Primo loco cepit Sanctum Germanum, quantum potuit expoliavit, et
omnia mala quae facere valebat faciebat, per totum regnum depraedabat, et homines