Petri Cantinelli: Chronicon

73


Et missum fuit pro domino Malatesta de Arimino, domino Guidone de Polenta de
Ravenna, domino Rodulfino de Calixidio de Cesena, et domino Ranberto de Polenta potestate
Forlivii, et pro sapientibus ipsius terre Forlivii, ut Faventiam venirent dicta occasione. Et
responsum fuit eis, per dictos Romaniolos, quod nullo modo volebant spanare foveas, nec destruere
stechatam, neque fortilicias, quas fecerant in civitate Faventie. Et sic, die dominico XIV
mensis septenbris, recesserunt de civitate Faventie predicti dominus Gentilis potestas et anbaxiatores
civitatis Florentie.
Item, eodem anno, die mercurii XVII dicti mensis septenbris, dominus Maghinardus Paganus
de Sosenana capitaneus populi civitatis Faventie equitavit, cum maxenata comunis Faventie et
aliquibus de militibus ipsius civitatis, ad Rontanam, ipsumque castrum Rontane munivit bonis
custodibus, et incepit ipsum inforciare, faciendo in ipso poço unum fortem gironem et unam
turrim, et fecit portari calçem, pro ipsa turri facienda et construenda, de civitate Faventie.
Item, eo anno, die primo mensis novenbris, illustris vir dominus comes Guido de Montefeltro,
cum trecentis militibus et MM peditibus, intravit civitatem Urbini, ipsamque terram
fecit muniri et inforciari bonis fossis et stechatis, que prius fuerant splanata, et muri ipsius
civitatis diruti per dominum Guilielmum Durantem comitem Romaniole.
Anno domini millesimo ducentesimo nonagesimo tercio, indictione VI, die iovis primo
kalendarum ianuarii, de nocte, dominus Maghinardus Paganus de Sosenana et Bernardinus
et Albericus comites de Cunio, cum aliquibus ex militibus et popularibus de Faventia et eorum
fidelibus, equitaverunt ad castrum Montis Maioris, comitatus Imole, in quo erant custodes pro
comite Alexandro de Romena, ipsumque castrum et turrem et totam fortiliciam ad eorum
dominium habuerunt, reiectis et expulsis custodibus, qui eum custodiebant.
Item, eo anno, de mense ianuarii, obiit magnus et potens dominus comes Guido Novellus;
item obiit dominus Ugolinus de Sino de Ubaldinis.
Item, obiit dominus Guido Riçius de Polenta.
Item, per totum illum mensem ianuarii, et per mensem februarii, fuit bonum tenpus et
clarum et lucidum, et non fuerunt nives neque pluvie, nisi ultima die februarii, qua fuit
nix et pluvia, et postea pluribus sequentibus diebus.
Item, eodem anno millesimo CC nonagesimo tercio, die primo mensis marcii, fuit potestas
Faventie, pro sex mensibus, dominus Iohannes Çottus filius domini Malateste de Arimino, et
dominus Maghinardus capitaneus.
Item, eodem anno, die sabati XXI mensis februarii, obiit magnificus et potens vir dominus
Obiçus marchio de Feraria, relictis tribus filiis, scilicet Açone, Aldrovandino et Francisco;
qui Aço, die tercia predicta, factus fuit dominus Ferarie, Mutine et Regii.

Torna all'inizio