D.
a.Terminus ad dilatorias et declinatorias proponendas.
Constitutis in iudicio coram domino archyepiscopo suprascripto
P et R predictis, et petito per ipsum dominum
archyepiscopum a dicto R utrum cedere vel contendere
velit, quia respondit se velle contendere, et excepciones
aliquas efficaces habere, videlicet talem et alias suo loco
et tempore proponendas, ad dandas in scriptis omnes
excepciones dilatorias et declinatorias quas in hac
causa proponere vel dare intendit ad diem mercurii proximum,
si curia fuerit, alioquin ad primam diem curie sequentem,
peremptorium terminum assignavit.
b. De excepcione exconmunicacionis.
A .
Notandum est qualiter super excepcione exconmunicacionis
notarius debeat se habere.
Que quidem excepcio, licet proponi possit in qualibet
parte litis, quia sepius ante litem contestatam proponitur,
ideo nunc de ipsa merito est tractandum.
Et est sciendum quod exconmunicacionis excepcio interdum
proponitur contra iudicem, et aliquando contra
partem.
Quando proponitur contra iudicem, tunc statim reus
excepcione proposita suum eligit arbitrum, et iudex suum
debet eligere, quod totum notarius in actis debet scribere
diligenter, et postquam ita electi sunt, eis debent destinari
littere secundum formam supra in tractatu de arbitris
annotatam, salvo quod hic est certus terminus a iure statutus
infra quem exconmunicacionis excepcio est probanda,
ibi vero terminus est a iudice statuendus.
|
|