Conradus illustri regi Navarre.
Invitat nos antiqua patris dilectio erga vos dudum habita de vestra speciali
dilectione confidere et vos ad succedentium serenitati nostre processuum
participium evocare. Scimus enim, ut non improperando preterita,
sed suaviter referendo loquamur, quod adhuc in teneris annis vobis sub
matris regimine positis eiusdem genitoris nostri continua sollicitudo non
defuit, quin potius arduis imperii tunc et Germanie negotiis intermissis
causam vestram viriliter assumpsit in propriam et contra persequtorum
suorum incursus pro restauratione vestrorum iurium multis persone
laboribus ac rerum impendiis laboravit. Propter quod vos, nobis tam carnis
unione coniunctos quam specie necessarie gratitudinis obligatos, nova
de nobis libenter audire felicia credimus et in cause nostre subsidium
paratas invenire confidimus vires vestras.
|
|