Bichilinus de Spelo: Pomerium rethorice

Pag 3


PROHEMIUM
 
Assit in principio sancta Maria.
Incipit summula quedam in arte dictandi prosaice, que artis
regulas comprehendit et breviter vicia necessario evitanda resecat
et multa epistolarum fragmenta in se colligit ad dictionis et epistolarum
prohemium.
 
Dilecto parte nature, mire virtutis et gracie titulis insignito D.
Stephano Nayn, canonico Veneto multe probitatis et circumspectionis
Bichilynus Spelensis, vallis Spoletane de partibus, in Paduano Studio
moram trahens, perpetue sinceritatis memoriam sub renovacione semper
amicicie firmioris.
Compulit me nimium vestre multimode postulacionis instancia de
hiis, que dudum ab antiquis autoribus in dictamine prosaico profunde
narrata exstiterant et diffuse, quedam vobis breviori ac clariori volumine
compilare. Crebris demum vestre dileccionis precibus acquiescens,
insudavi sollicite vestris desideriis, quamvis insufficiens, complacere.
Verum, quia non solum Candelabri et Poetrie Novelle doctrina,
sed eciam ipsarum epistolarum practicacione continua, de hiis,
que ad doctrinam dictaminum pertinent, vos diligenter instruxi, ea
tamen decrevi vobis rudi quadam scripcione congregare, que ad communem
et utilem stilum, et tot innumerabilium ipsius rethorice copiam
regularum, quod vestrum nolui frustra ingenium occupare. Decerpens
igitur hinc inde pulchriora librorum, et ea que a me ipso habere potui
superaddens, in hac nove composicionis forma flores intexui varios,
qui, licet numero pauci, satis tamen multiplicabuntur habunde inter
manus providi et pensoris. Non ergo subrideat quispiam, nec aliqua ex
parte nostrum opusculum invidiose contempnat: maioris enim autoritatis
efficitur, dum ab antiquis et magnis autoribus ut plurimum cernitur
depilatum.

Torna all'inizio