Magistrorum epistola ad imperatorem pro suo negotio
Invictissimo et gloriosissimo suo domino F. Xristi gratia Romanorum imperatori semperque augusto, divinae facultatis magistri Rol. Pe, Gan. atque Guidottus Bononie permanentes devotissimae subiectionis et sincere fidelitatis constantiam.
Quoniam Deus in cuius manu sunt omnes potestates et universa iura regnorum vos ad celsitudinis Romani imperii culmen voluit promoveri et suo sancto chrismate in tam saluberrimum principem consecrari ut omnium Xristianorum presertim clericorum et pauperum Xristi potens protector ac benignus tutor existatis idcirco imperatorie maiestatis clementiam prece qua possumus humiliter deprecamus quatinus celsitudinis vestre mandatum Bononiensium potestati noviter iniunctum ut scolares videlicet Mediolanenses, Brixienses atque Cremenses de civitate vestra penitus expellantur sic pro salute ac remedio anime vestre nunc temperare dignemini ut saltem clerici ad honorem et servitium vestrum valeant in studio remanere et pro incolumitate vestra Ihesum Xristum semper exorare.
|
|